Thursday, July 2, 2015

मसाला भेंडी

आज भेडीची जरा वेगळी भाजी केलीय. मस्त लागतेय :-)

साहित्य:
भेंडी पाव किलो
ओल्या खोबऱ्याचा चार इंचाचा तुकडा
भाजलेले दाणे मूठभर
मिरच्या 6
आलं एक इंचाचा तुकडा
हरभरा डाळीचे पीठ दोन मोठे चमचे
हळद अर्धा चमचा
हिंग, मोहरी फोडणीकरता
तेल 3चमचे
साखर अर्धा चमचा (ऑप्शनल)
चिंच एक इंचाचा गोळा
एक कांदा

कृती:
भेडी स्वच्छ धुवून, पुसून शेंडा बुडखा काढून एक एक इंचाचे तुकडे करून घ्या. कांदा बारीक चिरून घ्या.
पॅन मधे बेसन पीठ कोरडेच भाजून घ्या. त्याचा कच्चेपणे जाईल इतपतच. ते मोठ्या बाऊलमधे काढून घ्या. त्यात चिरलेला कांदा घाला.
मिक्सरमधे मिरच्या, आलं, खोबरं, दाणे, चिंच सगळे उबडधोबड कोरडेच वाटून घ्या. हे वाटण कांदा, बेसन यात एकत्र करा. मीठ, साखर, हळद घाला.
आता पॅनमधे तेल गरम करून मोहरी, हिंग यांची फोडणी करा. मोहरी तडतडली की भेडीचे तुकडे टाका. छान परतून घ्या.  आता यात एकत्र केलेले वाटण, बेसन, कांदा घाला. पुन्हा छान परता. गॅस बारीक करून झाकण ठेवा. दोन मिनिटांनी झाकण काढून भाजी परता. पुन्हा झाकण ठेवताना खालून पुसून घ्या . भाजीत ते बाष्प पडू देऊ नका.
पुन्हा पाच मिनिटांनी हेच करा. आता झाकण न ठेवता पाच मिनिटं भाजी मंद गॅस वर परता.
तयार आहे खमंग मसाला भेंडी :-)

स्त्रोत : माझेच प्रयोग